हवामान

पावसाचा खंड
२० ऑगस्ट२०१७

हवामान विभाग; खरीप संकटात

पुणे (प्रतिनिधी) : अरबी समुद्रात पावसासाठी पोषक हवामान तयार होत नसल्याने पाऊस लांबला आहे. जोरदार पावसासाठी २० अॉगस्टपर्यंत वाट पाहावी लागणार असून, हवेचा कमी दाब असलेल्या काही ठिकाणी हलक्या सरी बरसत असल्याची माहिती हवामान विभागाच्या सूत्रांनी दिली. सध्या सुरू असलेल्या पावसाच्या खंडामुळे मराठवाडा, विदर्भासह राज्यातील खरीप संकटात सापडला आहे.

सध्या अरबी समुद्रात हवेचा दाब जास्त असल्यामुळे पावसासाठी पोषक हवामान तयार होत नसल्याचे चित्र आहे. अशी स्थिती अजून चार ते पाच दिवस राहील. पंधरा आॅगस्टनंतर ही स्थिती बदलली तर जोरदार पाऊस होईल, असा अंदाज आहे.
- सुनीता देवी, शास्त्रज्ञ, हवामान विभाग, पुणे.

मराठवाडा आणि विदर्भात काही ठिकाणी हवेचा दाब कमी अधिक आहे. त्यामुळे मराठवाड्यात अनेक ठिकाणी ऊन असून, काही ठिकाणी ढगाळ हवामान आहे. त्यामुळे हवेत दमटपणा वाढून आर्द्रतेत वाढ झाली आहे. शेतकऱ्यांना जोरदार पावसाची चिंता लागून असून, पिकेही पाण्यावाचून अखेरची घटका मोजत आहेत. बऱ्याच धरणांतील पाण्यानेही तळ गाठला आहे. परिणामी, पिण्याच्या पाण्याचा प्रश्नही पावसाळ्यात ऐरणीवर आला आहे.

सध्या अरबी समुद्र आणि महाराष्ट्र या भागात १००६ ते १००८ हेप्टापास्कलएवढा हवेचा दाब आहे. उत्तरेकडील हिमालयासह आसाम, उडिसा व बिहार राज्यात हवेचा दाब १००४ हेप्टापास्कलएवढा आहे. त्यामुळे बंगालचा उपसागर आणि अरबी समुद्राकडून वारे उत्तरेकडे सरकत आहे. परिणामी राज्यात हवेचा दाब वाढत आहे. त्यामुळे राज्यात पडणाऱ्या पावसाचे प्रमाण अत्यंत कमी आहे.
कोकणाच्या काही भागांत हवेचा दाब कमी आहे. तेथे अधूनमधून हलका पाऊस पडत आहे. घाटमाथ्यावरही हलका ते मध्यम स्वरूपाचा पाऊस पडत आहे. मध्य महाराष्ट्र, मराठवाडा आणि विदर्भाच्या काही भागात हवेचा दाब अधिक असल्याने पाऊस पडत नसल्याचे चित्र आहे. १४ आणि १५ आॅगस्ट रोजी मध्य महाराष्ट्र व मराठवाड्यात काही ठिकाणी हलका पाऊस पडण्याची शक्यता आहे.
कोकणातील वाल्पोई, कल्याण, दाडोमार्ग, संगमेश्वर देवरूख येथे सोमवारी (ता. ७) रात्री हलक्या स्वरूपाचा पाऊस पडला. तसेच कोयना, लोणावळा, शिरगाव घाटमाथ्यावरही हलक्या सरी कोसळल्या. परंतु मध्य महाराष्ट्राच्या काही भागात हवेचा दाब १००६ हेप्टापास्कलच्या दरम्यान आहे. त्यामुळे मध्य महाराष्ट्रात अनेक ठिकाणी पावसाने दडी मारलेली आहे.
विदर्भात काही ठिकाणी हवेचा दाब कमी होता. त्यामुळे भिवपूर, पवनी, मूळ, नागभिर, उमरेड, आरमोरी, चंद्रपूर, गडचिरोली, चिखलदरा या भागात हलका ते मध्यम स्वरूपाचा पाऊस पडला. मंगळवारी (ता. ८) कोकणातील काही ठिकाणी व घाटमाथ्यावर अधूनमधून हलका पाऊस पडत आहे. तर मध्य महाराष्ट्र, मराठवाडा आणि विदर्भातील अनेक भागात ढगाळ हवामान होते. काही ठिकाणी ऊन पडले असून वातावरणात काही प्रमाणात दमटपणा वाढला होता.
-------------
शनिवारपर्यंत हलका पाऊस
कोकण, गोव्यातील बहुतांशी ठिकाणी शनिवारपर्यंत (ता. १२) हलका पाऊस पडण्याची शक्यता आहे. मध्य महाराष्ट्र, मराठवाडा व विदर्भात काही ठिकाणी अधूनमधून हलक्या सरी बसतील. आज (बुधवार) कोकणातील अनेक ठिकाणी हलका पाऊस पडेल. मध्य महाराष्ट्र, मराठवाडा व विदर्भातही तुरळक ठिकाणी हलका पाऊस पडण्याची शक्यता असून काही ठिकाणी ढगाळ हवामान राहण्याचा अंदाज हवामान विभागाच्या सूत्रांनी वर्तविला.
---------------
मंगळवारी (ता. ८) सकाळी आठ वाजेपर्यंत झालेला पाऊस (मिलिमीटर)
कोकण ः वाल्पोई ५०, कल्याण ४०, दोडामार्ग, संगमेश्वर देवरूख ३०, लांजा, मुंबई, पोलादपूर, फोंडा, सांगे, सावंतवाडी, वाडा २०, कानकोण, इला, जव्हार, कणकवली, कर्जत, म्हसाळा, मुल्दे, पणजी (गोवा), पेण, राजापूर, रोहा, सांकेलिम, श्रीवर्धन, वैभववाडी १०.
मध्य महाराष्ट्र ः गगनबावडा, गारगोटी १०.
मराठवाडा ः गंगाखेड, लोहा, पालम ३०, आष्टी, बिलोली २०, हिमायतनगर, जिंतूर, मुदखेड, नायगाव, खैरगाव, पाथरी, वाशी १०.
विदर्भ ः भिवपूर १८०, पवनी ११०, मूळ १००, नागभिर, उमरेड ९०, आरमोरी, चंद्रपूर, चिमूर, काटोल, कही ५०, अर्जुनीमोरगाव, ब्रह्मपुरी, लाखंदूर ४०, देसाईगंज, गडचिरोली, हिंगणा, कुरखेडा, मुलचेरा ३०, बल्लारपूर, धानोरा, हिंगणगट, कळमेश्वर, समुद्रपूर, सेलू, वारद २०, भद्रावती, भंडारा, चार्मोशी, चिखलदरा, कामठी, इटापल्ली, लाखानी, मोहाडी, नरखेड, पोम्भूर्णा, शिंदेवाही, सिंरोचा, तुमसर १०.
घाटमाथा ः कोयना (नवजा) ३०, कोयना (पोफळी) २०, लोणावळा (टाटा) शिरगाव, वळवण, डुंगरवाडी १०.